occitan

Joan lo fadat

Per Jean-Bernard Plantevin

D'ausir dins :

Jan lou fada

Escotatz ben mei bòns amics
L’istòri de Joan lo marrit
Qu’un jorn lei gents per l’emmerdar
An batejat : « Joan lo fadat » !
L’ai coneigut a la meirala,
Fasiá encara dins sei braias
E agantava lei cigalas,
Dins lo quieu ié metiá la palha.

Joan lo fadat disiá :
« Ieu de ma sopa, ne’n vòle pas
E puei l’escòla me rend gagà.
Me levar d’ora, me convèn pas
E lei gendarmas m’agradan pas. »

Dins lo quartier, lei gents disián :
« Joan lo fadat, èi pas colhon,
E belèu meme, e belèu meme, e belèu meme qu’a completament reson ».

Joan lo fadat, puei a grandit
Au mitan dei fòra-bandits
Dei renegats, dei margolins
Dins l’amaresa e lo morbin.
E per apasimar sa fèbre
De temps en temps Joan s’empegava.
Com’èra un pauc tròp pica-pebre,
S’escaufava e puei reguinhava.

Joan lo fadat disiá :
« Ieu, mon patron me fai crebar
E lo travalh me fai susar.
Mon perceptor m’escota pas
E mon banquier vòu m’agantar ».

Dins lo quartier, lei gents disián :
« Joan lo fadat, èi pas colhon,
E belèu meme, e belèu meme, e belèu meme qu’a completament reson ».

Joan lo fadat èra testard
Res jamai lo fasiá plegar.
Se preniá pas per un bastard
E faliá pas lo bostigar.
Mai se d’asard un paure tipe
Anava un pauc a la desbranda,
Tant lèu li prestava sa pipa
E li durbiá sa pòrta granda.

Joan lo fadat disiá :
« Ieu, leis arleris m’agradan pas,
Lei bòns per ren me fan biscar,
Lei cura-borsas me fan renar,
Lei manja-paures me fan gular ».

Dins lo quartier, lei gents disián :
« Joan lo fadat, èi pas colhon,
E belèu meme, e belèu meme, e belèu meme qu’a completament reson ».

Joan lo fadat, ara qu’es vièlh,
Se crèi un pauc lo rèi di rèi.
Tronant sus lo banc dei madurs,
Cren plus degun e fai lo dur.
Ditz en cridant la mina fièra
Que per chanjar un pauc lo monde
Faudriá descendre per carriera
E faire petar quauquei bombas.

Joan lo fadat ditz mai :
« Ieu, lo fast-food, me convèn pas,
Leis OGM me fan petar,
Lo hamburger me fai racar
E lo Cocà me fai cagar ».

Dins lo quartier, dison totjorn :
« Joan lo fadat, èi pas colhon,
E belèu meme, e belèu meme, e belèu meme qu’a completament reson ».

5 cançons del meteis grop :

Comentaris

Vos cal connectar per poder postar de comentaris.

Concepcion : Aure Séguier, Grafismes : Géraldine Puel