occitan

L'escobilhaire

Per Jean-Antoine Peyrottes

Dins lo monde òm vei de tot caire
Que mai que ieu cadun se crei.
Teni mon reng, escolbilhaire,
De la carrièra soi lo rei.
Ai per mon tròn una carreta
Ont me quilhi aprèp mon prètzfach ;
Ma corona es una boneta
E mon sceptre aquò’s un balag.

A !!! s’ai la man sala es utile
A tota la societat,
Sai mantener dins cada vila
L’aire sanís e la propretat.
Per tant que prenga sas mesuras,
La poliça ni per mettre d’empach,
Ai per mon compte las orduras
Qu’empòrti amb pala e balag.

Quand òm vòl ganhar la vidassa,
Tot n’es pas de flors aiçaval !
Lo malur sens vergonha embarassa
Aquel que viu de son trabalh.
D’unes, tant lèu que venon de naisser
Prenon l’existéncia a l’ensag,
D’autres enfin per poder pàisser
Cal que trainen lo balag.

Soi dels darnièrs, d’aquò ne’n raii,
A mon còr, parla la rason,
E content, mangi se trabalhi,
Lo pan ganhat per ma susor.
Lo riche, jamai me codoissa,
S’en faot, quand es un pauc distrach
Crida : orror ! mas n’ai pas l’enveja
D’espolsar sus el mon balag.

Dison qu’avèm drèit d’insoléncia
Aquò d’aquí n’es pas vertat.
Se mancam, es per ignorància,
L’insoléncia, aquò’s la fiertat.
Daissar lo mòt sens faire la causa
Dieu ne’n pòt esser satisfach
Perque, quand nòstra ama es sens rason
Faire fi de l’òme al balag ?

Cadun sa plaça, òmes del monde !
De la meuna rogissi pas
Que lo vici pertot desbonde
Cresètz que se confla d’enbàs ?
De corrupcion n’i a fòrça menas !
Se teniatz a ne’n esser desfachs
I perdriái mon temps e ma pena
A mai lo margue del balag.

Cossí volètz que vos respecte
Quand volètz pas me respectar ?
Se trobatz que vos infecte
Veni de vos desinfectar !
Sèm totis de la metèissa bosa
Lo metèis motle nos a fach.
Lo frac ne’s pas mai que la blosa
Lo jonc es mens que lo balag.

1 cançon del meteis grop :

Comentaris

Vos cal connectar per poder postar de comentaris.

Concepcion : Aure Séguier, Grafismes : Géraldine Puel