occitan

Ar resplan la flors enversa

Per Jean-Antoine Peyrottes

Ar resplan la flors enversa
pels trencans rancs e pels tertres
quals flors ? neus gels e conglapis
que cotz e destrenh e trenca
don vei mortz quils critz brais siscles
en folhs en rams e en giscles
mas mi ten vert e jauzen jois
er quan vei secs los dolens crois.Car enaissi m’o enverse
que bel plan mi semblon tertre
e tenc per flor lo conglapi
e-l cautz m’es vis que-l freg trenque
e-l tro mi son chant e siscle
e paro-m folhat li giscle
aissi-m sui ferm lassatz en joi
que re non vei que-m sia croi.Mas una gen fad’enversa
com s’eron noirit en tertres
que-m fan pro peitz que conglapis
qu’usquecs ab sa lenga trenca
e-n parla bas et ab siscles
e no i val bastos ni giscles
ni menassas ans lor es jois
quan fan so don om los clam crois.Car en baizan no-us enverse
no m’o tolon pla ni tertre
domna ni gel ni conglapi
mas non-poder trop en trenque
domna per cui chant e siscle
vostre bel olh mi son giscle
que-m castion si-l cor ab joi
qu’eu no-us aus aver talan croi.Anat ai com cauz’enversa
lonc temps sercan vals e tertres
marritz com om cui conglapis
cocha e mazelh’e trenca :
qu’anc no-m conquis chans ni siscles
plus que fels clercs conquer giscles
mas ar - Deu lau - m’alberga jois
malgrat dels fals lauzengiers crois.
Mos vers an qu’aissi l’enverse
que no-l tenon bosc ni tertre
lai on om non sen conglapi
ni a fregz poder que-i trenque
a midons lo chant e-l siscle
clar qu’el cor li-n intro-l giscle
cel que sap gen chantar ab joi
que no-s tanh a chantador croi.
Doussa domna amors e jois
nos ten ensems malgrat dels crois.
Joglar granren ai mens de joi
car no-us vei e-n fas semblan croi.

1 cançon del meteis grop :

Comentaris

Vos cal connectar per poder postar de comentaris.

Concepcion : Aure Séguier, Grafismes : Géraldine Puel