Ab l’alen tir vas me l’aire
qu’ieu sen venir de Proensa!
Tot quant es de lai m’agensa,
si que, quan …

Legir tot

Ab l’alen tir vas me l’aire
qu’ieu sen venir de Proensa!
Tot quant es de lai m’agensa,
si que, quan n’aug ben retraire,
ieu m’o escout en rizen
e.n deman per un mot cen:
Tan m’es bel quan n’aug ben dire.

Qu’om no sap tan dous repaire
cum de Rozer tro c’a Vensa,
si cum clau mars e Durensa,
ni on tant fins jois s’esclaire.
Per qu’entre la franca gen
ai laissat mon cor jauzen
ab lieis que fa.ls iratz rire.

E s’ieu sai ren dir ni faire,
ilh n’aia.l grat, que sciensa
m’a donat e conoissensa,
per qu’ieu sui gais e chantaire.
E tot quan fauc d’avinen
ai del sieu bell cors plazen,
neis quan de bon cor consire.