Li pastourèu
An fa uno assemblado.
Li pastourèu
An tengu lou burèu ;
Aqui chascun a di sa rastelado,
E s’es counclu, la paraulo dounado.
D’ana, d’ana
Vers lou
pichot qu’es na.
Tóutis ensèn
Se soun mes en campagno,
Tóutis ensèn
Em’un fort marrit tèms.
Es bèn verai que li gènt di mountagno
Soun fa à tout,
crègnon rèn la magagno;
S’en van, s’en van,
E laisson si caban.
Coume faran
Pèr noun senti la biso ?
Coume faran ?
Crese que periran.
Toui sis abit soun que de telo griso.
Soun tout trauca, ié veson la camiso ;
Li trau, li trau,
Tènon pas gaire caud.
Nòsti pastras
A tres ouro sounado,
Nòsti pastras
Arribon dins lou jas.
Lou capèu bas e la tèsto courbado,
Van, tout courrènt, saluda l’acouchado
E fan, e fan
La coulado à l’Enfant.
Laisson au sòu
Dous o tres bon froumage.
Laisson au sòu
Uno dougeno d’iòu.
Jóusè ié dis : Fasès que fugués sage,
Tournas-vous en, e fasès bon
vouiage !
Bergié, bergié,
Prenès vòsti coungié.
