Ont existís aquel país que se ditz Ucraina ?
Tanplan benlèu non existís, mas degun se’n maina…
Cisampa front del …

Legir tot

Ont existís aquel país que se ditz Ucraina ?
Tanplan benlèu non existís, mas degun se’n maina…
Cisampa front del paradís, granissa tintaina,
Crica la nèu coma lo ris, la filha se desgaina,
E ieu la man sus un eriç. Coneissi pas Ucraina .

Quora cantava lo Grand Duc ? Del temps dels Polhaires :
Un regiment pas fregeluc, e los tambornaires…
Mas qué podiá tant d’abeluc contra los reis laires ?
Pargues d’aram de truc en truc, quantes de pesolhaires ?
Copèron lo còl del Grand Duc. Oblidi los Polhaires.

Virasolelh, vira la flor sus la tia camisa.
Una prison per mon amor, la flaçada grisa.
Rastolhs sen fin del camp d’onor sens crotz ni devisa.
Per cada pèl la sia prusor : l’espasa nos avisa.
Vira lo solelh sus la flor, garda la tia camisa.

Per arrestar l’aiga del riu cal una paissièira,
Per la pregària de bon diu manca la frairièira.
Se me vòls pas, dormís un brieu sus la coissinièira.
Darrièira nuèch del meu estiu, torna lusir l’aubièira.
Caminarai lo long del riu, vau cercar la paissièira.

Granissa sus aquel país que se ditz Ucraina :
Es a la broa del paradís, cisampa tintaina.
L’infern benlèu non existís, mas degun se’n maina…
Posca de nèu coma de ris, una filha sens gaina,
Picons de mòrt, barba d’eriç, cementèris d’Ucraina.