Anueit nòsti vesin eron toti en festa
emé si tamborins me fasien mau de testa
Corrien per campanha emé gran …

Legir tot

Anueit nòsti vesin eron toti en festa
emé si tamborins me fasien mau de testa
Corrien per campanha emé gran plesir
ieu avieu la lanha, podieu pas dormir

D’entendre aqueu gran brut ieu sabieu plus che faire
cresieu d’estre perdut, revilhere ma maire
Come podetz creire me sieu abilhat
e sieu anat veire çò qu’era arribat

En fasent mon camin, rescontrere Justina
ieu ie diguere ansin: "Digatz-me, ma vesina:
me porriatz pas dire çò qu’es arribat?"
S’ei botada a rire e me l’a contat

M’a dich qu’un beu garçon a pres nòsta natura
Per pagar la rançon de totas creaturas
Tre que l’entendere aguere gran gau
e ié correguere come ’n perdigau

En arribant au liòc ont’era l’Acochada
ie faguere bòn fiòc: era tota jalada
e puei despleguere un beu pedas blanc
e ieu ajudere a mudar l’enfant

Tre que fuguet mudat prenguere mi clinquetas
me botere a cantar la tan-lura-lureta
Cantere e dancere per lo rejoir
Mai m’enraumassere, fau ren che tussir.

Ara n’ai pas lesir de vos contar lo resta
mai se voletz venir deman que sarà festa
Veirem l’acochada e l’enfant au breç
Tocarem l’aubada, direm de Nové