Tura lura lura lo gau canta
E n'es pas encara l'auba !
Tura lura lura lo gau canta
E n'es pas encara jorn !
Voes-ti venir ? - Nanni, nanni !
Vendràs pron ben ! - Ne'n farai ren !
Guilhaume, Guilhaume,
Au mens se non tòrni plus,
Mi faràs dire un sant-psaume !
Ailàs mon Dieu ! Que farai ieu ?
Siáu maluros coma un polet,
Quand siáu solet, quand siáu solet !
Tura lura lura l'aura mena
E me fai bofar lei dets !
Certa ieu siáu ben en pena,
Ai pòu de morir de freg !
Òu ! de l'ostau ! - Cu pica avau ?
Vòli loegear ! - Siam toei cochats !
Granjiera, granjiera,
Duerbes me, siáu tot jalat,
Bota me dins la feniera,
Ailàs mon Dieu ! Que farai ieu ?
Lo paure onte tirarai ?
Benlèu morrai, benlèu, morrai ?
Tura lura lura lei ribieras,
An dejà tot inondat !
Vèsi plus ren lei brotieras
Benlèu me faudrà nedar !
Quauque barquet ! - N'i a pas de què !
Ont'passarai ? - Certa non sai !
Sauvaire ! Sauvaire !
Tu n'as ges de caritat !
Es pas ansin que fau faire !
Ailàs mon Dieu ! Que farai ieu ?
Lo paure onte passarai,
Me negarai, me negarai !
Tura lura lura per fortuna,
Siáu sortit d'un michant pas !
La pòdi comptar per una,
Enfin ai trobat lo jas !
Bonjorn a tos ! - Emai a vos !
De que fasètz ? - Vos lo vesètz !
Maria, Maria,
Siás la maire d'un bèu fièu
As ganhat la loteria !
Ailàs mon Dieu ! Que farai ieu ?
Siáu maluros coma un polet,
Quand siáu solet, quand siáu solet !
