Al prumièr cavan de servici a Blagnac, ripi redde, segur. Ai pas lo temps de vos contar perque mas quò's …
Legir tot
Al prumièr cavan de servici a Blagnac, ripi redde, segur. Ai pas lo temps de vos contar perque mas quò's aital. Iò, los ausèls de nuèit, los bòti a mon ora, los fusèls oraris m'en adòbi. Sus mon Airbus A 380, me'n vau en vacanças e mas vacanças quò's Doman. Doman quò's la mòrt a las pòtas e lo rison de la Joconda dintrat dins lo punh de Vinci.
Doman quò's la sola idèia valida que vos trasconeissi. Las vòstras constitucions, las vòstras moralas, la vòstra cafeta-al-lach del matin, las vòstras camisas escaladas e que plissonan sus lo pressing, lo prumièr a man gaucha, dins vòstre barri, tot çò que vos brida, tot çò que vosautres subre-aimatz, tot çò qu'es vòstra mòrt jornadièra, tot aquò per iò quò's acabat.
Sus los estanhs, los cavals minjan de las flors blasidas e lors fotòs a se miralhar dins las aigas tristas lor tòrnan a lors morres tot embrumats. Damanda endonc una dotzena de cavals a ton florista !
Doman ? Un mot, un cadieral desossat, una cançon parlada d'una votz reglada al metronòme deus grands vents del nòrd flaquetant sus la cauçada d'una vila perduda, una gojata esplamida dins un canton de pòrta e se senhant a l'aprosmada del panaire de dròllas, una letra postada tròp d'abora e que lo portor de corrier a Paris a cinc oras e mièja de vespre voldrá pas te tornar que te conneis pas, la boita d'aspirina que tu minjes en te furgar lo cap e en cercar de costat una espiada frairala, aquesta botelha d'aiga minerala que quite ven pas de la terra, quela veitura que ripa e que t'engòrja l'autostrada.
Doman ? Al prumièr cavan de servici a Blagnac, me tiri, sèi a devenir lo manca un, res.
Sèi Res.
Lo tipe qu'espies aqueste ser sus la scena, aquel òme emb los pials blancs e son cap que sembla un trapèzi, es pas aquí.
Las cançons que canta, tot çò que t'arriba dins los uèlhs e las aurelhas, tot aquò fuguèt fach, dich e tornat dich dempuèi fòrça temps.
Lo tipe que gaites quò's de la semblança.
Doman quò's la mòrt figurada. E la vos vendon quela mòrt figurada, lo vos vendon aquel artista blancorit jols projectors talhat-coseguts, josmetuts. Vos vendon per paquetons, per cadierons un artista que s'es vendut per un pretz acceptat !
L'argent quò's lo rison del desesper.
Doman quò's tanben lo desesper. Alara, Doman seràs ric, mon camarada. Per que çò que te dòni a pas de pretz.
Agrada-me coma iò t'agradi. Doman, t'aimi.
