Crida dab la trompeta
Tons espleits, vanitós,
Fadòt, presomptuós,
Lèisha'm soleta.
Seg tas mila valors
Vè-te'n aulhors !

Ja que …

Legir tot

Crida dab la trompeta
Tons espleits, vanitós,
Fadòt, presomptuós,
Lèisha'm soleta.
Seg tas mila valors
Vè-te'n aulhors !

Ja que hès batalhada
De ma simpla amistat,
Jo vei hens quin estat
M'aurés botada
Tu qui la vanitat
Rend tant en.hlat.

Si plan m'avès aimada
Qu'at aurí conegut
Si t'avèn trobat mut
A la velhada,
On as semiat lo brut
Qui m'an rendut.

La timida careça
Non sap tròp çò qui vòu.
La trompeta, lo shiulòu
Tot que la blessa.
Un bohet, l'arrajòu
Tot que'u da paur.

Plus lèu mica es.hlorida
Dab bèth amistoset
Qui parla a miei alet
Qui cranh l'audida
E sap guardar tà d'eth
Lo son secret.

Si quauqua estremviada
Gostava un bahurlèr
Tu qu'ès lo qui volè.
Vè'u dar l'aubada.
Jo't barri l'escalèr
Deu men solèr.