Dins lo som tot raibassos de nuech gialada,
Sus lo liech ente lo vielh 'viesa sa mòrt fincar sos dets, …

Legir tot

Dins lo som tot raibassos de nuech gialada,
Sus lo liech ente lo vielh 'viesa sa mòrt fincar sos dets,
Las feures venen jugar lor comedia,
Li minjar sa paubra testa de folia, de dolor.
Ai Lemosin !... Ai Lemosin !...

Leberon en granda tenguda de nòça
Lo pleja dins son linçòu : vaque, vam far lo torn dau ciau.
Darrier las nivols negras que fan riseia,
'Nas vielhas totas rossas d'un lop capit ronhen l'òssas.
Ai Lemosin !... Ai Lemosin !...

'Na dròlla tota nuda ufla son ventre,
Sos tetins b'assetz pitits son dins la biaça dau bon Diu.
Un mitrat tot esmalit geta son veire
De meschaent vin sus la crotz ente gema lo sauvador.
Ai Lemosin !... Ai Lemosin !...

Sus 'na rota de lunons 'na graula blancha
Balha dau mieu de burgaud a daus borges de carnavau.
En sus dins 'na broa de fum 'na p'ita clardat,
Ente daus pitits auseus n'an pro de purar lor degreu.
Ai Lemosin !... Ai Lemosin !...

Lo rei dau ciau emb son debeu e la sega,
Los miseros nabacuols, los que se trainen sus lo cuol,
Tota lo malaür en lai que marcha, marcha,
E dins lo vent que se'n vai, las gorbelhas creden lor pair,
Ai Lemosin !... Ai Lemosin !...

Lo diable, sos delesers, fan sarabenda ;
Vaque lo vielh, 'quo es plasent, veiras que rísem tot lo temps !
Leberon 'trapet lo vielh : 'quo es 'na meissonja ...
Lo vielh que 'visava en lai, era crebat de freg, lo vielh.
Ai Lemosin !... Ai Lemosin !...

Ai cassat ma jòia dins 'queu grand voiatge,
Marcharai lo monde dedins mon vargier.

Aitau 'quo es ben, coma 'na …

Legir tot

Ai cassat ma jòia dins 'queu grand voiatge,
Marcharai lo monde dedins mon vargier.

Aitau 'quo es ben, coma 'na festa,
Aitau 'quo es ben, ai paur de res.

Ai cassat ma chamba sus 'na raiç de cassis,
Parlarai lo monde de sus l'esbalet.

Ai cassat ma lenga sus bona paraula,
Fumarai lo monde dedins lo canton.

Ai cassat ma pipa sus 'na dent meschaenta,
Pensarai lo monde de mon chapdeliech.

Ai cassat ma testa sus 'na granda edeia,
Durmirai lo monde dins lo fuec d'infern.

Ai cassat ma bana sus la negra pòrta,
Virarai lo monde jos 'na peu de lop.

Aitau 'quo es ben, coma 'na festa,
Aitau 'quo es ben, ai paur de res.

Un bruch dins la miegnuech, as-tu auvit ?
Saber d'ente 'quò ven, as-tu auvit ?
Laissa-me durmir, laissa-me.

'Quo es …

Legir tot

Un bruch dins la miegnuech, as-tu auvit ?
Saber d'ente 'quò ven, as-tu auvit ?
Laissa-me durmir, laissa-me.

'Quo es lo vent, 'quo es lo chen, as-tu auvit ?
Lo rainard que nos pren, as-tu auvit ?
Ai paur, escota, leva-te.

'Quò marcha bravament, as-tu auvit ?
'Quò se 'planta suvent, as-tu auvit ?
'Quò se 'preima 'qui, mesfia-te'n.

'Quò monta l'esbalhon, as-tu auvit ?
'Quò ven raubar chas nos, as-tu auvit ?
Te'n prege, vai-l'i e tua-zo !

E l'òme se levet, as-tu auvit ?
Sas malinas prenguet, as-tu auvit ?
Lo fusilh, lo fusilh perque ?

'Quò vira lo luquet, as-tu auvit ?
La pòrta dreibiguet ...
Vaque Mili ! 'Quò es mas lo diable ... Ses chas te ...
T'esperavam dempuei dempuei ...

L'eschantit, la lenga daus mòrts,
Esperava lo pelegrin :
Vielh romiu, romivatg'es mòrt,
Ton chamin, tu setz subrevists.

L'arpion d'aqueu …

Legir tot

L'eschantit, la lenga daus mòrts,
Esperava lo pelegrin :
Vielh romiu, romivatg'es mòrt,
Ton chamin, tu setz subrevists.

L'arpion d'aqueu gapian te 'trapara lo cuer,
Te tirara lo sang, lo ciau s'enduerm.

Tots 'quilhs borges cafauds escupiran sus te,
Credaran que se fòu, quilhs lengatgiers.

La boalha daus barris te fara pas debeu,
Te copara a bocins emb son coteu.

Lo mitrat, los curets, los quites meirilhiers,
Se signaran sus te au nom dau pair.

E las vielhas loiras te contaran luras,
Te faran coalevar dins lo rajat.

Tots los gasis loinards, tots los leberonants,
L'ostieras, los pendards t'insultaran.

Lo chavan daus grands bòscs se pausara sus te,
Te fincara lo cèu com' un vielh chen.

La font es 'qui dins son fons,
Sola, sorna, sala, es pus de sason,
Son sent l'i es perdut de …

Legir tot

La font es 'qui dins son fons,
Sola, sorna, sala, es pus de sason,
Son sent l'i es perdut de sens,
Silencios, secret, sauvatge suvent.

Portant l'ai visda envasida de pelegrins
Que l'i venian un còp per an per l'i se garir,
Era corguda, coneguda paln lunh d'aici;
Borges, paisans chaminavan, far lurs desvoacions.

Era vocada, dedicada a sent Martin,
Sents Peire e Pau per lo grand mau, per los romatisms.
A Margarita qu'es tant p'ita lo mau chaitiu,
A sent Meen los nervs, las dents, las paurs daus pitits.

D'aqueu vilatge lo messatge d'aqueu romiu
Que fai lo torn, pica de jorn, per lo frair, l'amic.
Sancier, malauda, gilet, blauda, cana, fusilh,
Vielh mendicant, fier permenant, merchand de rosins.

Òm se'n fretava, se'n voidava dins los abits,
A plen culhier, a plen sulhier, çò que pòt chavir.
'Quò sangolhava, pescholhava a plen pais,
Las botelhas mai las selhas per menar chas ilhs.

'Viesa 'quel aubre, espia paubre de que fluris,
Tots 'quilhs vestits, pelhas que l'i 'chaben de puirir.
Crotz de faugiera, 'na pregiera per lo bon Diu,
Ligas de còu, penchons, liacòus per sent Remedi.

Peças, promessa, quita messa, patois, latin,
E 'quilhs pajans que minjavan de bon apetis.
Violon, chabreta, ase, breta, chat blanc, chen gris,
Borreiadors, sundirs d'amor, la seja daus grilhs.

L'òula dins la freg bulhis son voide,
Lo relòtge a perdut son temps,
'Quò sent a meschaent de vielha mòrta, …

Legir tot

L'òula dins la freg bulhis son voide,
Lo relòtge a perdut son temps,
'Quò sent a meschaent de vielha mòrta,
L'i a daus suvenirs que germenien.

La balada uei, disen la festa,
Mas que bilhan lo bruch de color ;
Entre doas jarras de majoreta,
Ai vist lo darrier costume tròp cort.

Lo temps clar que finca la Briança,
Farem gerba bauda au chasteu ;
Si vesiatz, monsur, 'queu chabretaire,
Nos ven d'a Paris, prenetz un gasteu.

Manifestacion dins la montanha ;
los pinhiers vòlen tornar chas ilhs ;
Se balhen 'na man sindicalista
Sus l'eschina magra dau pais.

Au, sent la font, vierja vierjòta,
'Quo es chaça volanta 'questa nuech ;
L'i aura las graulas per far la bassa,
Lo mestre d'escòla, lo curet.

L'i aguet lo vilaud « balha ta pauta »,
lo chat penchenat, l'auseu sabent ;
De guerra mancas ? As be la chaça !
L'i aguet dos tres lops que torneren.

Un vedeu sen vai per l'Italia,
Son pair es partit au Canada ;
Lo mestre perdut dins la banlega ;
De l'estachador la cadena.

Nòstre leberon, clardat electrica,
Bòta caodchoc, peu simili,
Mòstra que segonda, que jorn data,
Paiat tots los mes per lo bon Diu.

Un pendut rosseu, lo chen que udla,
La luna que boissa lo fogier,
Tot çò que chau per far l'espectacle,
La freg dins l'eschina daus borges.

A l'en debas darrier 'queu silenci,
Lo miegjorn credara de son vin.
Mena-lo qu'empluiam nòstre veire
A nojar la mòrt dau Lemosin.

Lemosin chanta, aluia chanta, tota flor dau prat.
Lemosin lebre, lop rainard lebre, per l'eternitat.

Lemosin lamba, lo fogau lamba, …

Legir tot

Lemosin chanta, aluia chanta, tota flor dau prat.
Lemosin lebre, lop rainard lebre, per l'eternitat.

Lemosin lamba, lo fogau lamba, l'estiu dins lo sang.
Lemosin pura, legrema pura, purara tertant.

Lemosin creba, teulada creba, sus 'na broa de ciau.
Lemosin sagna, lo cuer li sagna, portaram son dòu.

Lemosin dança, borreia dança, la festa daus mòrts.
Lemosin venta, l'auta que venta, per 'plantar lo Nòrd.

Lemosin diable, se ritz lo diable, te ten dins sa man.
Lemosin balha, pren çò que balha, ne'n faram deman.

Nos 'rieba 'qui l'enser... se'n tòrna l'eimandin...
Es tot esserpelhat... mas li balharam res...
Çò-ditz : sei leberon... mas leberon …

Legir tot

Nos 'rieba 'qui l'enser... se'n tòrna l'eimandin...
Es tot esserpelhat... mas li balharam res...
Çò-ditz : sei leberon... mas leberon es mòrt...
Ma fe fai tròp de temps... qu'am pas perdut de chen...
Sa peu n'es pas de lop... mas de rainard nonmas...
Minja quauqu'uns polets... mas crebarian solets...
Legrema dins la nuech... mas n'autres durmen ben...
Si nos fasia dau mau... lo getariam en lai...
Coma degun se'n planh... que coige dins lo fen...
Si fai parlar de se... faram parlar de nos...

Quand 'quò sera la fin daus temps
Farem lo grand charbonadis
De nosilhieras de bon sents :
'Quò sera festa …

Legir tot

Quand 'quò sera la fin daus temps
Farem lo grand charbonadis
De nosilhieras de bon sents :
'Quò sera festa per los grilhs.

Si los bons sents vòlen de nos
Nos crubirem de faugieras
Devers la font daus tres esbalhons :
'Quò sera 'na mòrt aürosa...

Mas si los sents escupissen
'Nirem crebar coma daus chens
Dins 'na taupada tot en laens :
'Quò sera 'na mòrt sens plaser.

Quand 'quò sera la fin daus temps
Farem lo grand charbonadis
De nosilhieras de bons sents :
'Quò sera festa per los grilhs.

'Na maison, 'quo es be res 'na maison,
Mas que l'i aja de que rentrar.
'Na taula, 'quo es be …

Legir tot

'Na maison, 'quo es be res 'na maison,
Mas que l'i aja de que rentrar.
'Na taula, 'quo es be res 'na taula,
Mas que l'i aja de que minjar.

'Na cairia, 'quo es be res 'na cairia,
Mas que l'i aja de que 'chaurar.
'Na lenga, 'quo es be res 'na lenga,
Mas que l'i aja de que parlar.

'Na viena, 'quo es be res 'na viena,
Mas que l'i aja de que dançar.
'Na chambra, 'quo es be res 'na chambra,
Mas que l'i aja de que aimar.

Lo negre, 'quo es be res lo negre,
Mas que l'i aja de que raibar.
'Na tòrna, 'quo es be res 'na tòrna,
Mas que l'i aja de que credar.

Lo diable, 'quo es be res lo diable,
Mas que l'i aja de que prejar.
E la mòrt ? 'quo es be res la mòrt,
Mas que l'i aja de que tornar començar.

Si 'trapas ton cuol a gorjada, espia-me 'quela sensena !
'Quo es lo vilatge d'una maison, e 'quò l'i es …

Legir tot

Si 'trapas ton cuol a gorjada, espia-me 'quela sensena !
'Quo es lo vilatge d'una maison, e 'quò l'i es tot plen de degun.

L'i a daus teules pas de charpenta, l'i a daus chapiaus pas bastits.
L'i a daus carreus pas de fenestra, l'i a l'esbalhon sens l'esbalet.

L'i a lo pecon sens la chatiegra, l'i a dau fuec mas pas de fogier.
L'i a 'na 'gulha pas de relòtge, l'i a be lo jorn manca la nuech.

L'i a be la fuelha mas pas l'aubre, l'i a la pluma mas pas l'auseu.
L'i a be daus piechs mas p'una vacha, l'i a l'aurelha sens lo conilh.

L'i a daus cornards mas pas de bana, l'i a 'na bacada sens ganhon.
L'i a 'n abot mas l'i a pas de peira, l'i a 'na berle pas de panier.

L'i a be lo champs mas pas de terra, l'i a lo grun mas pas d'espija.
L'i a be un riu mas l'i a pas d'aiga, l'i a de las moras sens romecs.

L'i a lo chapeu mas pas de testa, l'i a la crabata sens lo còu.
L'i a de la peu mas l'i a pas d'òssa, l'i a 'na ponhada sens la man.

L'i a lo pais sens la campanha, l'i a lo paisan sens lo pais.
Si 'trapas ton cuol a gorjada, espia-me 'quela sensena.

Pestelen lo dalh de la mòrt, pin, pin, pin...
E fialen lo dalh de la mòrt, balirta balarta...
E ben …

Legir tot

Pestelen lo dalh de la mòrt, pin, pin, pin...
E fialen lo dalh de la mòrt, balirta balarta...
E ben segur, de rason, la mòrt es 'qui...
Pas tant òrra, mas la mòrt tot parier.

E tota faiçon, degun la tòrna pas coneisser.
Los que la sabian tornar coneisser son mòrts,
Los que li sabian parlar son mòrts,
Los que la sabian avesar son mòrts.
E la mòrt pas tant òrra mas la mòrt : Vaque...

L'i faram pas velhada que degun sap pus la velhada,
L'i faram pas riseta que degun sap pus la riseia,
L'i faram pas memòria que degun sap pus la memòria,
L'i beuram pas un quite veire de vin,
un quite cafet, 'na quita tisana.
L'i coparam pas lo prumier eschalon,
lo que compta, lo que còsta...

Anes, bonser v'autres, som ben mòrts.

Venguet lo temps que lo monde agueren vergonha.
Agueren vergonha d'ente damoravan ;
Lor pais lemosin d'aiga freja d'ivern, vergonha …

Legir tot

Venguet lo temps que lo monde agueren vergonha.
Agueren vergonha d'ente damoravan ;
Lor pais lemosin d'aiga freja d'ivern, vergonha n'agueren.

Venguet lo temps que lo monde agueren vergonha.
Agueren vergonha d'ente s'acialavan ;
Lor cròs de maison sorne, de fum de chaminada, vergonha n'agueren.

Venguet lo temps que lo monde agueren vergonha.
Agueren vergonha de çò que minjavan ;
Lor chastenha rabinosa de brasa chauda, vergonha n'agueren.

Venguet lo temps que lo monde agueren vergonha.
Agueren vergonha de çò que sabian far ;
Lor coteu crochador dau clessau de velhada, vergonha n'agueren.

Venguet lo temps que lo monde agueren vergonha.
Agueren vergonha de çò que dançavan ;
Lor borreia en resson dau mai prund de la terra, vergonha n'agueren.

Venguet lo temps que lo monde agueren vergonha.
Agueren vergonha de coma marchavan ;
Lor biais de se campar dins lor còrs sus la terra, vergonha n'agueren

Venguet lo temps que lo monde agueren vergonha.
Agueren vergonha de çò que cresian ;
Lor quite leberon, tan pesant sus l'eschina, vergonha n'agueren.

Venguet lo temps que lo monde agueren vergonha.
Agueren vergonha de çò que parlavan ;
Lor lenga sarcida de tant de fiau de temps, vergonha n'agueren.

Venguet lo temps que lo monde agueren vergonha.
Agueren vergonha de coma parlavan ;
Dire tant dins tan pauc en far rire son eime, vergonha n'agueren.

Venguet lo temps que lo monde agueren vergonha.
Agueren vergonha de çò que coneissian ;
Lor luna de dicton, de conte viralenga, vergonha n'agueren.

Venguet lo temps que lo monde agueren vergonha.
Agueren vergonha de coma sonhavan ;
Lor erba de Sent Ròc a la crotz de font bona, vergonha n'agueren.

Venguet lo temps que lo monde agueren vergonha.
Agueren vergonha de quand foiejavan ;
Lor fadum de carnavau que lo tot desvirava, vergonha n'agueren.

Venguet lo temps que lo monde agueren vergonha.
Agueren vergonha de çò qu'eren ;
Çò que los avia fachs çò qu'eren, vergonha n'agueren.

Maudich sia lo temps que lo monde agueren vergonha,
E maudich sian lo monde dau temps de la vergonha.

Vos vòle contar 'na istòria,
'Na p'ita chausa de ren.
Se vira dins ma memòria,
Ten de la plaça per …

Legir tot

Vos vòle contar 'na istòria,
'Na p'ita chausa de ren.
Se vira dins ma memòria,
Ten de la plaça per dietz.
Me bargassa dins la testa,
Juga los cuòls beneisits.
Venetz, portatz vòstra 'sieta,
Minjatz-me 'queu suvenir.

Dins 'quilhs temps fasía misera,
Aviam pas l'aíse de pan.
Era plan nastra la terra,
Volia pas veire lo blat.
Anava a la picoreia,
Ieu que coneissia la nuech,
De que far 'na fricasseia,
De que n'engraissar un det.

Un ser de luna 'chabada
Que raubava quauqu'uns uòus,
Viguei 'na femna chabrada
E me faguei bocaraud.
'Quò z-era pas 'na miraudia
- Venia pas de Ventadorn -
Ne'n faguei pas 'na malaudia,
Lamberem lo sautador.

Li dissei : Seras ma femna,
L'i a be misera per dos ;
'Nirai raubar per te femna,
E tu tendras la maison.
Aitau faguerem l'annada,
Topinairitz, leberon,
Un jorn la viguei uflada,
Zo trobei a ma faiçon.

'Laidonc la volguei coijada
Per mainatjar mon pitit.
Ieu farai be ta boissada
E, quand 'ribara l'estiu,
Me balharas 'queu mainatge,
Sera crestian per la font,
Frotjara dins lo vilatge
E n'autres seram aüros.

Mas quand se voidet ma femna,
Margari era chas nos,
E la n'emportet ma femna.
E quand 'visei mon garçon :
Era banard, era negre,
Avia la pus lonja coa,
Era banard, de piau negre,
'Quo es lo diable qu'aviam coat.

Lo 'trapei de per 'na pauta,
L'assomei 'pres lo balet.
Ma fe, 'quò seria ma fauta
Si lo diable corguia uei.
Ma femna dins la chapela,
L'autre chas l'escarissor,
Mas chercharai 'na piucela
Per mon prupchen còp d'amor.