Souto lou soulèu que rabino,
La belugo part e boumbis
E la ramihado
cracino
E la flamasso s’espandis.
Nivo de fum dins lou cèu rouge
Lou fiò au mitan di bramas
Degoulo tout, moustre ferouge,
Nòsti fourèst soun de brasas.
En lònguis erso, li flamado
S’escarvarton pèr devouri
Tout ço que viéu dins l’encountrado,
Que viéu e que vòu pas mouri.
De l’infemalo grasihado
Mounto un
chafaret ensourdant,
Lou soulèu sus la mau-parado
Rajo de lagremo de sang.
Agarrus, cade, pin, blacas
Souvagino, e nis, e jas,
Oulivié, roure, acacia
Tout a rima, crema, brûla !
Pièi tout es mort, la mort peleto
S’implano dedins l’orre cèu,
Lis aubre, nègris escaleto,
Recataran plus lis aucèu,
Béurai plus à
la font secado,
Anarai plus m’espaceja
Dins l’oumbro fresco di ramado,
Es fini, an tout massacra !
Lou sabien pas, li tantalòri,
Que lou pin gardavo memòri,
Lou sabien pas, li gargamèu
Qu’empeguèron aquéu flagèu
Bos, à nôsti bôri,
Que l’éuse me disié l’istôri
De nòsti glòri d’àutri tèms,
De moun païs e de
mi gènt !
Agarrus, cade, pin, blacas
Souvagino e nis e jas,
Oulivié, roure, acacia
Tout a rima, crema, brûla !
Amo di sèuvo armouniouso,
Te leissen
veni segrenouso,
E fasen rèn pèr t’apara
Anen dounc te leissa creba ?
