A perdut son caton,
Son caton a partit.
La paura Margoton
N’a meme perdut l’apetit.
Car dedins son canton
Lei …

Legir tot

A perdut son caton,
Son caton a partit.
La paura Margoton
N’a meme perdut l’apetit.
Car dedins son canton
Lei gents lei plus marrits
Dison que son caton
Ara es ben mòrt e qu’es finit.

Dison tanben que s’es gitat
Dedins lo fons d’un grand valat,
E que s’es fach tot escrachar
E puei qu’es tot escrabolhat !

Margòt te ne’n fas pas,
Escota ton amic,
Leis autrei son fadats
E se ton caton a partit,
Es anat promenar
Dins un autre païs :
Aièr l’ai vist passar
En direccion dau Paradís.

Era montat d’escambarlon
Sus una fusada en carton,
E s’envolava vèrs Pluton
Per veire se i a de ratons !

A perdut son caton,
Son caton a partit.
La paura Margoton
N’a meme perdut l’apetit.
Se dedins son canton
Lei gents lei plus marrits
Dison que son caton
Ara es ben mòrt e qu’es finit.

Dison tanben qu’a cabussat
Que s’es fach tot ratatinar
E puei que s’es fach rosigar
Tot entier per lei corpatas !

Margòt te ne’n fas pas
Escota ...

Ai un chin que japa pas
E un chin qu’es un pauc gòi.
Aqueu que pòu pas japar
Pòu jamai …

Legir tot

Ai un chin que japa pas
E un chin qu’es un pauc gòi.
Aqueu que pòu pas japar
Pòu jamai japar lo gòi.
Mai lo gòi, eu, pòu japar
An aqueu que japa pas.

Refranh :
Chin-cat-chin-cat-chin-cat- cat,
Chin-cat-chin-cat-cat.

Ai un chin qu’es un pauc gòi
E un chin que japa pas.
‘Queu que marcha de guingòi
S’estramassa a chasque pas.
Lo chin qu’es pas gòi es gai,
E lo chin gòi es pas gai.

Ai un cat qu’ataca pas
E un cat karatekà.
Lo caton qu’ataca pas
Se fai tratar d’acatat
Per lo cat karatekà
Que fai ‘quò per cacalar.

Ai un cat que cassa pas
E un cat un pauc colhon.
Aqueu que pòu pas cassar
Se fai tratar de colhon
Per aqueu que pòu cassar,
Que fai ‘quò per l’agassar.

Ai un cat un pauc colhon
E un cat que cassa pas.
Aqueu qu’es un pauc colhon
S’escagassa per sopar.
Saup pas lipar son bolhon
Sens enviscar leis arpions.

Lo chin gòi, lo cat colhon
Fan que de se chicanar.
Lei chins fan pas de catons
Mai lei chins son « estats-cats ».
Mesclar lei chins ‘mé lei cats
Es un pauc tròp delicat.
Come es un pauc complicat
Me’n vau belèu arrestar !

Diga-me un pauc, Papet,
Come as fach per venir vièlh ?
E s’es verai, mon Papet,
Qu’un bèu jorn serai …

Legir tot

Diga-me un pauc, Papet,
Come as fach per venir vièlh ?
E s’es verai, mon Papet,
Qu’un bèu jorn serai parèlh ?
Diga-me un pauc, Papet,
Perqué tei peus an tombat ?
E perqué tei paurei pès
Te pòdon plus suportar ?
Diga-me un pauc, Papet,
Se leis ans fan venir vièlh ?
Tu que n’as setanta-sèt
E ieu que n’ai tot juste sièis .

Vaquí pichòta Babet
Come me siáu fach Pepèi .
As que comptar sus tei dets,
Un, dos, tres, quatre, cinq, sièis.
Lèu-lèu viron lei minutas,
Lo relotge buta-buta.
Lei minutas fan leis oras,
Leis oras, ansin, fan lei jorns,
Lo relotge ditz « Bònjorn! »,
E puei lei jorns fan lei mes,
Lo relotge fai tres-tres .
E lei mes fan leis annadas,
Lo relotge bada-bada .
Enfin d’annada en annada
Joinessa s’es enanada...

Diga-me un pauc, Papet,
Come as fach per venir vièlh ?
E s’es verai, mon Papet,
Qu’un beu jorn serai parèlh ?
Diga-me un pauc, Papet,
Perqué tei dènts an tombat ?
E perqué tei paurei dets
Fan que de tremolejar ?
Diga-me un pauc, Papet,
Se leis ans fan venir vièlh ?
Tu que n’as setanta-sèt
E ieu que n’ai tot juste sièis .

Vaquí pichòta Babet
Come me siáu fach papet,
Come d’annada en annada
Joinessa s’es enanada...

1 - Per aqueu qu’a tròp set, dona-li de ton beure,
E per ‘queu qu’a tròp fam, dona-li de ton …

Legir tot

1 - Per aqueu qu’a tròp set, dona-li de ton beure,
E per ‘queu qu’a tròp fam, dona-li de ton pan.
Per ‘queu qu’a ren de ren, dona-li ‘n pauc per viure,
E per ‘queu qu’es solet, dona-li ‘n pauc la man.

R- ‘Queu que vòu pas donar sara abandonat.
Alòr, tu pòs donar e tant pis per aqueu,
E tant pis per aqueu, ‘queu que donariá pas
Pas meme la merda que li tomba dau quieu !

2 - Per aqueu que saup plus, dona-li ta paraula,
E per ‘queu qu’es preissat, dona-li ‘n pauc de temps.
Per ‘queu qu’a ges d’ostau, duèrbe-li ta cadaula,
E per ‘queu qu’a tròp mau, dona-li fòrça ben.

3 - Per aqueu qu’es tristàs, dona-li ‘n pauc de jòia,
E per ‘queu qu’a tròp freg, dona-li de calor.
Per ‘queu que ne’n pòu plus, dona-li ‘n pauc de vòia,
E per ‘queu qu’es perdut, dona-li ‘n pauc d’amor.

Siáu tot solet, plòu mai-que-mai
E lei degotas degolinan
En cracinant coma un cascalh
De campanas e de mandolina.

Ieu, …

Legir tot

Siáu tot solet, plòu mai-que-mai
E lei degotas degolinan
En cracinant coma un cascalh
De campanas e de mandolina.

Ieu, me siáu lèu-lèu esquilhat
Sot l’aiga que lagremejava.
E la raissa a desrevilhat
Mon caton que penequejava.

Siáu tot solet, plòu mai-que-mai
E pense a ma Catarineta
Que i aviáu promés lo còr gai
D’anar culir quauquei violetas.

I anarem pas, se plòu, adieu !
La plueia amossa ma bofarda.
Lo cat s’acata còntre ieu,
S’alisca, se coifa e se farda.

Siáu tot solet, plòu mai-que-mai,
Solet coma a mon abituda.
Segur se plòu, vendrà jamai
Apasimar ma languituda.

Sus mei gautas ai sentit perlar
De gotas ò belèu de lagremas.
De paur de se faire esposcar
I a meme mon cat que s’estrema.

Siáu tot solet, plòu pas tant, mai,
Se fai tard e la nuech qu’arriba
Me buta au fons dau garagai
De mon espèr a la deriva.

E mon caton s’es esbinhat
Per anar vèire sa catona.
Per anar un pauc calinhar
‘Quela que l’ama e lo potona.

Sabe un païs, e una flor, (e una flor, e una flor)
Que l’apelam la de l’amor, (la de l’amor, …

Legir tot

Sabe un païs, e una flor, (e una flor, e una flor)
Que l’apelam la de l’amor, (la de l’amor, la de l’amor)

Refranh :
Vai pichòt, fau caminar, fau caminar,
Amont vèrs l’immortala.
Vai pichòt, fau caminar, fau caminar,
Lo païs fau cercar.

Eilamondaut, (i’a una lutz)
Fau i gardar (leis uelhs dessus)

Mai per i anar, (i a de romiàs)
Se ponharem (lei mans, lo nas)

Belèu veirem (jamai la fin)
La libertat (n’es lo camin)

Après lo su, (un autre su)
Après la lutz, (una autra lutz)

Sabe un païs, (e una flor)
Que l’apelam (la de l’amor)

1 - Tot au bot de ma carriera
I aviá un pichòt cafè,
E aquí dempuei la guerra
Viviá la …

Legir tot

1 - Tot au bot de ma carriera
I aviá un pichòt cafè,
E aquí dempuei la guerra
Viviá la Mamet Canet.
E la Mamet sens maniera
Versava un canon de vin
Per enlevar la misera
Dei paures e dei margolins.

R - Ah! Come eriam ben au cafè de Mamet Canet,
Quand tot en blagant nos fasiá caufar lo cafè.
Ah! Come eriam ben quand blagava un pauc dau passat
Dau temps que i aviá de margolins per rigolar :
I aviá Joan,
E Gaston,
Lo Nanan
E Ninon.
I aviá Martin
E son chin,
Savornin
E son vesin.

2 - Quand fasiá tròp caud, lei quecas
Venian faire un penequet
Tot en pipant la sibeca
Sot lo grand falabreguier.
Gaston refasiá lo monde
Quand èra un pauc empegat.
Disiá que la terra es ronda,
Que tot lo fasiá cagar !

3 - Joan qu’aviá ges de familha
Per pas restar tot solet,
Veniá beure una botilha
En cò de Mamet Canet.
Per oblidar la bordilha,
Lo Martin e lo Nanet
Venián faire una manilha
En cò de Mamet Canet.

R - Ah! Come eriam ben au cafè de Mamet Canet,
Quand tot en blagant nos fasiá caufar lo cafè.
Ah! Come eriam ben quand blagava un pauc dau passat
Dau temps que i aviá de margolins per rigolar :
I aviá Joan,
E Gaston,
Lo Nanan
E Ninon.
I aviá Martin
E son chin,
Savornin
E son vesin.

4 - Un jorn an agut l’idèia
D’espropriar lo quartier.
La Mamet se fasiá vielha
E a leissat son mestier.
Dempuei an fach a la plaça
Un bar que fai pizzerià.
Monte fan lipar de glaças
Amé de Cocà-Colà.

R - Come a ben chanjat lo cafè de Mamet Canet
Quasí tot l’estiu i a plen de toristas estrangiers.
Lo Joan, lo Gaston, e lo Nanan, e la Ninon,
Martin e son chin vendràn plus per beure un canon.
I a d’Anglés,
D’Alemands,
D’Olandés,
D’Italians.
De Japonés,
D’Austrians,
De Chinés,
D’Americans.

I a plus Joan
Ni Gaston,
Ni Nanan,
Ni Ninon.
I a plus Martin
Ni son chin,
Savornin
Ni son vesin.

Teò qu’èra pas tombat de la darriera plueia,
Disiá « Fau ben regardar vòlastrejar lei fuelhas,
Se vòlan devèrs l’adrech, …

Legir tot

Teò qu’èra pas tombat de la darriera plueia,
Disiá « Fau ben regardar vòlastrejar lei fuelhas,
Se vòlan devèrs l’adrech, deman ventarà.
Se vòlan devèrs l’ubac, segur que plorà.
Quand i a de moscas pegosas, aquò marca de plueia.
Quand la dindoleta ei bassa anonça mai de plueia.
S’un coguòu canta a l’adrech, segur que fai temps drech,
E quand plòu ‘mé lo temps drech, l’ase beu de drech ! »

Come me disiá mon amic Teò :
« Quand fai solèu, aquò me fai cantar ! »
A jamai escotat la meteò,
Que lo marrit temps lo fasiá cagar !

Teò disiá que fau crèire a çò qu’an dich lei rèires.
Segur se plòu per Sant-Joan (24-6), farà bèu per Sant-Pèire (29-6).
Lei plueias de Sant-Miquèu (29-9) restan pas au cèu,
E se plòu per Sant-Medard (8-6), plorà ben plus tard.
Disiá que per Sant-Martin (11-11) l’ivèrn es per camin,
Que per Sant-Florenç (23-2) l’ivèrn s’arresta ò repren.
Se fai freg per Sant-Vincenç (22-1), fai freg per Sant-Laurenç (10-8),
E lo marrit temps pren fin per Sant-Benjasmin (31-3).

Ai totjorn escotat l’amic Teò
Que disiá « Lo soleu me fai cantar ! »
Ai jamai escotat la meteò,
Que lo marrit temps fai totjorn cagar !

Teò, s’èra ben lunat, èra un bòn devinaire.
Disiá que la luna rossa, eu, li agradava gaire,
Tanben que l’aiga davala a la luna pala,
E que la jornada es franca a la luna blanca.
Disiá que per Sant-Matieu (21-9) es la fin de l’estiu.
E qu’es mai Sant-Gabrieu (24-3) qu’aporta lo novèu.
Qu’au mes d’abrieu te fau pas desliurar d’un fieu,
Mai se vòs au mes de mai, fai çò que te plai.

- Maman, ai fam ! Ai fam ! Maman !
- S’as tròp fam, mon enfant, manja ta man e …

Legir tot

- Maman, ai fam ! Ai fam ! Maman !
- S’as tròp fam, mon enfant, manja ta man e garda l’autra per deman...
- Manjar ma man, Maman ? Mai la qunta ? Ma man drecha ò ma man gaucha ? D’abòrd lei mans se manjan pas !
Pasmens, un jorn ai entendut un òme que reveniá d’Africa e que racontava que s’èra fach invitar a manjar per de canibales. E lei canibales li avián servit de fritas... Mai come sabiá pas leis abitudas d’aquelei gents, a demandat se lei fritas se manjavan emé la man. E lei canibales respondiguèron : « Non, non, nos autrei avèm l’abituda de manjar d’abòrd lei fritas, e puei après manjam la man. »...
Non, aquò son leis abitudas dei canibales de l’Africa. Nos autrei, la man, l’amam pas, la manjam pas. Lei canibales, elei, lei mans deis umans, lei manjan. Son gromands come de caïmans. Li van pas de man mòrta ! Lo cresètz pas ? Si, si es ben verai e pòde vos l’afortir, ne’n metriáu ma man a copar ! Pareis meme que manjan leis enfants, leis elefants, leis enfants deis elefants; oh fan ! Come fan per aguer tant fam ?

- Maman, ai fam ! Ai fam ! Maman !
- S’as tròp fam, mon enfant, manja ta man e garda l’autra per deman...
- Manjar ma man, Maman ? Mai la qunta ? Ma man drecha ò ma man gaucha ?
Se mange ma man drecha, come faire per te tocar la man ?
Se mange ma man gaucha, come faire per portar mon còr sus ma man ?
Se mange ma man drecha, come faire per gratar Maman.devina ? Per gratar ma mandolina ?
Se mange ma man gaucha, come faire per mesurar un pan, dos pans, tres pans... de pan ?

- Maman, ai fam ! Ai fam ! Maman !
- S’as tròp fam, mon enfant, manja ta man e garda l’autra per deman...
- Manjar ma man, Maman ? Mai la qunta ? Ma man drecha ò ma man gaucha ?
- Ma man gaucha, Maman, es un pauc gaucha. Per jogar ai bolas, es ma man que manca. Me mancariá belèu pas tant que ma man drecha, Maman. Car ma man drecha es la mai adrecha, la man que manca jamai, es la man que manda, es la man que demanda, es la man que comanda, es la man que recomanda. Finalament, ma man gaucha fai pas grand causa, es belèu ela qu’a un peu dins la man ?
Vò, mai de manjar ma man gaucha, ma man drecha ne’n sariá pas contenta. Come fariá ma man drecha quand s’embèstia per jogar a man dessús-man dessota ?
Come fariá ma man soleta quand a freg per se rescaufar ? Come fariá ma man soleta quand es sala per se lavar ? Come fariá ma man soleta per pregar a mans jonchas quand es trista ?
Alòr, crèse que fau lei laissar viure la man dins la man, come fai l’amant quand pren la man de l’amanta. M’aquò tot anarà charmant...

- Es per aujord’uei ò per deman ?
- De man... de que i a Maman ?
-As pas encara finit de badar tei mans ? Vène me donar un còp de man, qu’es tot ara l’ora de manjar.

Parlar de mans aujord’uei se pòu faire de mant una façons. Segur que l’ai pas fach de man de mèstre, mai podètz quand meme picar un pauc ... dins vòstei mans.

« Pren un calhau
Chasque jorn de l’annada
Dins lo pradau
Que n’i a de molonadas.
Carreja-lo »
Disiá Mamet …

Legir tot

« Pren un calhau
Chasque jorn de l’annada
Dins lo pradau
Que n’i a de molonadas.
Carreja-lo »
Disiá Mamet Nicòla,
« E manda-lo
Au clapàs de la còla ».

Un-per-un, lei calhaus se’n van,
Un-per-un, gróssir lo clapàs.
Un-per-un, lei pichòts enfants,
Un-per-un, devendràn drolàs.

De bòn matin
Quand partiáu per l’escòla,
Sus lo camin
Que vai de vèrs la còla,
Marchave siau,
Ère pron resonable
‘Mé mon calhau
Au fons de mon cartable.

Un-per-un, lei calhaus se’n van,
Un-per-un, gróssir lo clapàs.
Un-per-un, lei pichòts enfants,
Un-per-un, devendràn drolàs.

Mai un matin
Adieu a la morala,
Un margolin
M’a desmolit l’espatla.
Ai respondut
En lei mandant ma pèira
Se siam batuts
Come fan a la guerra.

Un-per-un, lei calhaus se’n van,
Un-per-un, escrachar lo nas,
Un-per-un, dei pichòts enfants,
Un-per-un, que fan lei gusàs.

Ai esparnhar
Au clapàs de ma vida.
N’ai pron susat,
Mai ma borsa es clafida.
Vau n’achatar
De molons de calhaus,
Per m’assostar
Ne’n farai mon ostau.

Un-per-un, lei calhaus faràn,
Un-per-un, un grand castelàs,
Un-per-un, per lei mieus enfants,
Un-per-un, quand saràn drolàs.

Pòrta un calhau
Chasque jorn de ta vida
Monta a-cha-pauc
De muralhas solidas
Per restancar
Lei grèus de ton terraire,
E reguinhar
Còntre leis estofaires.

Un-per-un, tei calhaus podràn,
Un-per-un, bastir un païs,
Un-per-un, que farà deman,
Un-per-un, nòstre paradís.

1- Lo dos d’avost, com’èra la costuma,
Vaquí Gaston mes sus son trenta-un
Qu’aviá cargat son plus polit costume,
‘Quò …

Legir tot

1- Lo dos d’avost, com’èra la costuma,
Vaquí Gaston mes sus son trenta-un
Qu’aviá cargat son plus polit costume,
‘Quò lo fasiá susar mai que degun.
E vaquí
Que mon Gaston marchava per carriera
Entendiguèt cridar un aut-parlor
Qu’aqueste soar e en avant promiera :
« Grand buòu-piscina....avís eis amators ! »

R- E lei gents :
« Vai-li Gaston
As de biais
E te fau
Pas cagar ei braias.
Vai-li Gaston
Fau jamai
Aguer paur
Se n’as dins lei braias ! »

2- E vaquí
Que mon Gaston ‘quò li virèt la tèsta
Talament qu’èra afeccionat dei buòus.
Partiguèt lèu eis arenas a la lesta
Per prendre plaça en esperant lei buòus.
E vaquí
Que mon Gaston quand veguèt lo bestiari
Devenguèt verd e voguèt lèu sautar.
Uros que per la pèu dau tafanari
Loisa aguèt lo temps de l’agantar.

R- « Anem, zòu !
Vai-li Gaston
As de biais e te fau
Pas cagar i braias.
Vai-li Gaston
Fau jamai
Aguer paur
Se n’as dins lei braias ! »

3- Li diguèt
« Fai atencion, emé ton bèu costume.
Es pas lo jorn de t’anar tot banhar »
Susava tant, e gonflat d’amertuma,
Diguèt : « Tant pis, vau quand meme i anar. »
E vaquí
Que mon Gaston per emmerdar Loisa
Garcèt au sòu sa vèsta e son capèu,
Enlevèt lèu sei braias e sa camisa
Puei sei soliers fachs de pèu de vedèu.

4- E Gaston
A lèu bombit dins l’arena publica.
Son braiet roge entrigava lo buòu.
E vaquí pas lo bestiau que raplica,
Gaston prenguèt sei cambetas a son còu.
Mai tròp tard
Car mon Gaston sus ‘na pèu de banana
A resquilhat sensa veire lo buòu
Que l’agantèt ‘mé son pareu de banas
E i estripèt son braiet come fau.

5- E vaquí
Que mon Gaston èra nus come un vèrme
Emé lei mans en guisa de braiet.
Tot vergonhós, volièt gratar lo tèrme*
Mai lo buòu lo gardava presonier.
E vaquí
Que per lei gents era la rigolada
Mai per Gaston faliá sortir d’aquí.
Mandèt lei mans dessus la barricada
M’aquò lei gents veguèron son quiquí.

6- Mai mon Gaston aviá paur qu’es pas de crèire
Segur lo buòu era ren a costat
Dei femas que volián veire per crèire
Se puei lo buòu i aviá ren enlevat.
Subitò
Per l’ajudar venguèron lei gents d’arma
Que lei femas an lèu garçat ‘mé lo buòu.
E come aquò èra pas au programa
Lei gents contents n’aguèron per sei sòus. (bis)

1- Coquin de sòrt, de matin
Quauqua ren me tracassa.
Es avau dins lo jardin,
De que i a que …

Legir tot

1- Coquin de sòrt, de matin
Quauqua ren me tracassa.
Es avau dins lo jardin,
De que i a que se passa ?
‘Quò es jamai arribat,
Lei legumes fan fèsta !
Ieu ne’n siáu tot espantat,
Ne’n vau perdre la tèsta !

R- Lo pebron emé la merinjana
Es aqueste matin que se van maridar.
Anatz lèu brantar lei campanas,
E viva lei nòvis ! Que son maridats !

2- Lei faiòus an començat
De faire de musica.
Lo juvert es ensordat,
Tot aquò lo panica !
La ceba fai que plorar,
Tot aquò la trebola.
L’alhet vòu farandolar
Emé la ferigola.

3- Lo raiçfòrt pòu plus dansar,
La tartifla es tròp lorda !
Lo caulet li a demandat
Se voliá la cocorda !
E puei lei pomas d’amor
Son totas roginetas
Quand cantan de cants d’amor
Emé lei cocordetas.

4- Puei lo pòrri fai valsar
Una bèla ensalada
Qu’a lo còr tot estrassat
E li fuelhas espossadas.
Lo concombre es malaut quand
La musica s’arrèsta,
Lei pastenargas se’n van
E l’api fai la tèsta.

R- Lo pebron emé la merinjana
An fach nòstre dinnar, leis avèm lèu manjats.
La ratatolha e la bajana
Èran mai que bònas e se siam regalats !

Quand ère pichonet (bis)
Restave emé, ti-ti-la-ri-ti, ti-ta-la-ri-tà
Restave emé mei grands (bis)

Un jorn mon grand diguèt :
« …

Legir tot

Quand ère pichonet (bis)
Restave emé, ti-ti-la-ri-ti, ti-ta-la-ri-tà
Restave emé mei grands (bis)

Un jorn mon grand diguèt :
« Vai te’n quèrre un - pan blanc »

Ai pres mon grand saquet
E siáu partit - subran.

A la bolenjariá
Ai rescontrat - Mian-Mian

Que me diguèt : « Janet,
Mai de que fas - deman ? »

I ai dich : « Vau au pradet
Per ramassar - d’aglans »

Lo lendeman venguèt,
E siam partits - pimpants.

Ieu, marchave darrier,
Ela, a partit - davant.

I ai portat son panier,
E m’a donat - la man.

I ai fach un beu boquet
Emé de flors de champs.

Per mercé me donèt
De rasins de - Sant-Joan.

A-n-un moment faguèt :
« Te vodriáu per - galant »

M’a fach un risolet
Tot en me po - tonant.

La paur puei me prenguèt,
E ai garçat - lo camp.

’Mé lei filhas sas que
Te fau i anar - plan-plan !