Ò Magali, ma tant aimada
Metes ta testa al fenestron !
Escota un pauc aquesta aubada
De tamborins
e de violons.
Es plen d’estelas aperamont
L’aura es tombada,
Mai leis estelas paliràn
Quand te veiràn !
Pas mai que dau murmur dei brandas
De
ton aubada ieu fau cas !
Mai ieu me’n vau dins la mar blonda
Me faire anguiala de rocàs.
Ò Magali se tu te fas
Lo peis de l’onda,
Ieu lo pescaire me farai,
Te pescarai.
Ò mai se tu te fas pescaire,
Tei vertolets quand gitaràs,
Ieu me farai l’aucèl volaire,
M’envolarai dins lei campàs.
Ò Magali se tu te
fas
L’aucèl de l’aire
Ieu lo caçaire me farai,
Te caçarai.
Ais perdigaus, ais boscaridas
Se venes, tu, calar tei laç
Ieu me farai l’èrba
florida,
E m’escondrai dins lei pradàs.
Ò Magali se tu te fas
La margarida,
Ieu l’aiga linda me farai,
T’arrosarai.
Se tu te fas l’aigueta
linda
Ieu me farai lo nivolàs,
E ieu me n’anarai ansinda
A l’America, perabàs !
Ò Magali se tu te’n vas
Alin ais Indas,
L’aura de
mar ieu me farai,
Te portarai !
Se tu te fas la marinada,
Ieu fugirai d’un autre laç :
Ieu me farai l’escandilhada
Dau grand solelh que fond lo glaç !
Ò Magali se tu te fas
La solelhada,
Lo verd limbèrt ieu me farai,
E te beurai !
Se tu te rendes l’alabrena,
Que se rescond dins lo bartàs,
Ieu me rendrai la luna plena,
Que dins la nuèch fa lum ai mascs.
.
Ò Magali se tu te fas
Luna serena,
Ieu bèla nèbla me farai,
T’acatarai.
Mai se la nèbla m’enmantela,
Tu per aquò non me tendràs
Ieu bèla ròsa virginela,
M’espandirai dins l’espinàs !
Ò Magali se tu te fas
La ròsa bèla,
Lo parpalhon ieu me farai,
Te baisarai.
Vai calinhaire, corre corre
Jamais, jamais m’agantaràs.
Ieu de la rusca d’un grand roire
Me vestirai dins lo
boscàs .
Ò Magali se tu te fas
L’aubre dei morre,
Ieu lo clòt d’èura me farai,
T’embrassarai !
Se me vòls prener a la brasseta,
Res qu’un vièlh
chaine arraparàs
Ieu me farai blanca mongeta,
Dau monastièr dau grand Sant Blas !
Ò Magali se tu te fas
Monja blanqueta
Ieu capelan, confessarai,
E t’ausirai !
Se dau convent passas las pòrtas
Totei lei monjas trobaràs
Qu’a mon entorn seràn per òrtas,
Car en susari me veiràs !
Ò Magali se tu te fas
La paura mòrta,
Adonc la tèrra me farai,
Aquí t’aurai !
Ara comenci enfin de creire
Que non me parlas en risent
Vaquí mon anelon de
veire
Per sovenença, ò bèu jovent !
Ò Magali, me fas de ben !…
Mai, tre te veire,
Ve leis estelas, ò Magali,
Coma an palit !
