Dirai vos senes doptansa
d’aquest vers la comensansa :
li mot fan de ver semblansa
escoutatz !
qui ves proeza balansa
semblansa fai de malvatz.
Jovens falh e franh e
briza
et amors es d’aital guiza
de totz cessals a ces priza
escoutatz !
chascus en pren sa deviza
ja pois no-n sera cuitatz.
Amors vai com la
beluja
que coa-l foc en la suja
art lo fust e la festuja
escoutatz !
e non sap vas qual part fuja
cel qui del foc es gastatz.
Dirai vos d’amor com
sinha
de sai garda de lai guinha
sai baiza de lai rechinha
escoutatz !
plus sera drecha que linha
quant eu serai sos privatz.
Amors soli’esser
drecha
mas er’es torta e brecha
et a colhida tal decha
escoutatz !
lai on non pot mordre lecha
plus aspramens no fai chatz.
Greu sera mais amors
vera
pois del mel triet la cera
ans sap si pelar la pera
escoutatz !
doussa-us er com chans de lera
si sol la coa-l troncatz.
Ab diables pren
barata
qui fals’amor acoata
no-il cal qu’autra verga-l bata
escoutatz !
plus non sen que cel qui-s grata
tro que s’es vius escorjatz.
Amors es mout de mal avi
mil omes a mortz ses glavi
Deus non fetz tan fort gramavi
escoutatz !
que tot nesci del plus savi
non fassa si-l ten al latz.
Amors a uzatge d’ega
que tot jorn vol qu’om la sega
e ditz que no-l dara trega
escoutatz !
mas poia de leg’en lega
sia dejuns o disnatz.
Cujatz vos qu’eu non conosca
d’amor s’es orba o losca ?
sos digz aplan’et entosca
escoutatz !
plus suau ponh qu’una mosca
mas plus greu n’es om
sanatz.
Qui per sen de femna renha
dregz es que mals li-n avenha
si com la letra-ns ensenha
escoutatz !
malaventura-us en venha
si totz no vos en
gardatz!
Marcabrus filhs Marcabruna
fo engenratz en tal luna
qu’el sap d’amor com degruna
escoutatz !
Jamai non s’engarcèt d’una
ni s’engarcèt
d’amistat.
