Sus nòstre polit terraire,
Dont lo dieu del vin Bacus,
Sol es lo gran emperaire,
Lo païsan viviá’n gus.
Refrin …
Legir tot
Sus nòstre polit terraire,
Dont lo dieu del vin Bacus,
Sol es lo gran emperaire,
Lo païsan viviá’n gus.
Refrin
Colha ardenta,
E valenta,
Glòria totjorn!
Pel miegjorn
Plena d’amor,
Lo sauvères un jorn.
La Robina, brica a brica,
Aviá tossit lo pus fòrt;
Reina èra la farlabica,
Lo país semblava mòrt.
Un bufal reviscolaire
Sul brave Argelièrs passèt
Fièr, restontiguèt dins l’aire
Lo crit dals quatre-vints sèt.
Partiguèron de Narbona
A pè, la saqueta & al còl:
Aquí faguèron tampona
En cridant son "Dieus ba vòl".
Pus tard a travèrs las vilas,
De colèra refofant
Los guses per mila e milas,
Anèron bramar la fam.
Dal bruch que pertot menèron
Siaguèt tan grand lo resson
Que per l’atudar ’landèron
Las pòrtas de las presons.
Apuèi venguèt de jorns piris,
Lo plomb de la mòrt fiulèt,
A Narbona, dals martiris
Lo sang arderós gisclèt.
Ara a lusit la victòria
Dal mal es sortit lo ben
Car d’aquí plena de glòria
A’spelit la C.G.V.
Dins l’istòria miegjornala
Argelièrs a’scrit son nom
Jos una paja eternala
Qu’espandirà son renom.
