O Verão
au moment just de ta preguiera a Nanda Ru
paire dau monde pastre d’ombras de tei rèires
a …

Legir tot

O Verão
au moment just de ta preguiera a Nanda Ru
paire dau monde pastre d’ombras de tei rèires
a l’endrech just qu’èra lo luòc onte nasquères
veniá la mòrt ò Verão.
O l’Indian
au luòc marcat per que ton arma s’esvaliga
venguèron lei tuaires dau capitau
a matar l’òme coma un bestiau
au moment just ò Verão.

La tèrra la tèrra tieuna l’avián raubada
e teis enfants leis an tuat
se la forèst s’es engraissada
de carn d’Indian a rasteladas.

O cacique
siás tombat lo guaraní e sus ton còs
mesclat au pòble d’ombras que fan tei rèires
monta lo pòble de la tèrra.
Grelhat de ta dolor
sorgís lo Pòble de la Tèrra
coronat de dolor.

Ò pòble mieu dins leis arbres
Ò pòble de saba
que convidas pòble viu tot lo monde
a reviure ta dolor

e tu dieu indian ò Nanda Ru
escotatz la vòtz taisada
de nòstre amic Marcos Verão.
Ditz Pòble nòstre de la Tèrra
ensems farem Tèrra de nòu.

Ò Verão
lei ciutats au moment just de ta preguiera
dei Continènts un vam de bala sentiguèron
que lei traucava d’una plaga d’espèr
e desvelhava ò Verão.
Per l’Indian
lo luòc marcat a desgorgat seis Amazonas
vèrs l’orizont lunchenc dau capitau.
Lo mond es tornat verd a ton senhau
de tèmps vengut ò Verão.

La tèrra la tèrra nòstra l’avián raubada
e nòstrei fònts empoisonadas.
la nòstra vida entresecada
mai verda au còr aviam la prada.

Dau cacique
guaraní mèstre de l’erba a son luòc just
apastura la mòrt una bala
bala que vèn vida baladoira una bala
e nais un pòble sus la tèrra
batejat de dolor
s’avança un pòble sus la tèrra
unit de sa dolor.

Ò pòble mieu dins teis usinas
sus tei terraires
que convidas pòble viu dins tei lengas
a l’Empèri que se mòr
sus l’autar d’erba d’un dieu indian
escota la vòtz taisada
de nòstre amic Marcos Verão.
Ditz Pòble tot de Tèrra tota
unit faràs Tèrra de nòu.