Es sus la talvèra qu’es la libertat,
La mòrt que t’espèra garda la vertat.
Cal segre l’orièra, lo cròs del …

Legir tot

Es sus la talvèra qu’es la libertat,
La mòrt que t’espèra garda la vertat.
Cal segre l’orièra, lo cròs del valat,
Grana la misèria quand florís lo blat.
Es sus la talvèra qu’es la libertat…

Per passar l’encisa te revires pas :
D’autan o de bisa pren lo vent sul nas,
Una pèira lisa, l’avenc es al ras.
Ont la sèrp anisa se fondrà lo glaç.
Per passar l’encisa te revires pas.

Estelas sens luna ne veirem la fin :
Ne perdrem pes una, cercam lo camin.
Lo cel tot s’engruna del ser al matin,
La bèstia feruna pudís lo canin…
Estelas sens luna ne veirem la fin.

Fraire contra fraire tiram lo cotèl :
Enfant de ta maire que val le tia pèl ?
La mia val pas gaire : un espet de fèl.
Quin aucèl becaire nos picarà l’uèlh ?
Fraire contra fraire tiram lo cotèl.

Es sus la talvèra qu’es la libertat.
D’orièira en orièira porta la vertat.
La vida t’espèra de cròs en valat :
Bolís la misèria quant grana lo blat.
Es sus la talvèra qu’es la libertat…