Lo calabrun es bartassièr
La lutz es mòrta
Ajas peitat de l'estrangièr
Dabans ta pòrta...
Lo caminaire se fai vièlh
E gareleja...
A de lagremas dins los uèlhs
Mai que de pluèja...
Tot vergonhós, coma se diu,
Plegant lo rable,
Te prèga per l'amor de Diu,
Dels sants, del diable...
Al nom de l'ase e del Mainat
A la borrassa
Paure Josèp, sus son palhat,
Demanda plaça...
Dins lo palais de tos vint ans
Qu'i sès portièra
Planhís l'Ulissa rajolant
E plen de nièras...
Un gòt de vin, un tròç de pan,
De mots a dire...
Alisa-lo dambe ta man
E ton sorire...
Li tornaràs abril e mai
Fins en decembre...
E vedrà jove que jamai
Dins cada membre...
Lo calabrun es bartassièr.
La lutz es mòrta.
Ajas pietat de l'estrangièr
Dabans ta pòrta.
