A se sabiás doça companha
Oc que los pus polits airals
Del mond son ben en Occitània
Quitariás lèu lèu …

Legir tot

A se sabiás doça companha
Oc que los pus polits airals
Del mond son ben en Occitània
Quitariás lèu lèu lo teu ostal...

Veja lo país de Mirelha
Bronzina de mila sentors
Aval quand l’amor i te solelha
Segur que ne perdirás los aucons
Lo qu’a pas vist lo pòrt de Marselha
Solide qu’a pas vist res de bon...

A se coneissiás la Corbièira
Redda dins son tramalh de fuòc
E tot al ras lo tombèu de pèiras
Onte Pirena plora son sòrt
Lo qu’a pas vistas las Pirenèias
S’es pas jamai passejat enluòc.

Pus luènh avèm Montanha negra
Perduda dins son fum daurat
Amont quand ressondís la bodega
La Saurimonda dança pels prats
Al pè los ròcs de Lacabareda
La fin del monde tenon anonciat.

E tèrra roja de Gresinha
Farina negra de carbonièr
E per las planas vairan las vinhas
Rimas de fruchas de cançonièr
Lo qu’a pas vist Santa-Cecila
E lo Sidòbre a pas vist res.

Aval es lo portalh de Concas
Per se fretar a santa Fé
E a costat la tèrra chucosa
Ont se cultiva lo saumancés
Lo que coneis pas Aubrac quand trona
Ni l’Estivada de tot fa mesprés.

A se coneissiás la mar granda
De Baiona fins a Bordèus
Entre los pins de la granda lana
Segur i dançariás un rondèu
Pus naut es Blaia que se desbranda
Dempèi la mòrt de Jaufre Rudèu.

Ai Limosin, tèrra Tolsana
Auvèrnha, Niça e Daufinés
Pertot s’ausís la lenga occitana
Jòia paratge e amor cortés
Pertot lusís la flor de milgrana
Dels trobadors sèm los eretièrs.

Ba me demandi
Ba te demandi
Occitania qu’es aquò ?

Occitania per ieu es poema
Una cançon ont cada mòt …

Legir tot

Ba me demandi
Ba te demandi
Occitania qu’es aquò ?

Occitania per ieu es poema
Una cançon ont cada mòt s’estrema
Un dessenh de totas las colors
Amb de rimas dins totes los cantons
Occitania per ieu es una ronda
Una sason ont lo solelh asonda
Una musica que pertot ressondís
Als quatre vents d’aquel polit país...

Occitania per ieu es una fèsta
Es un cant que jamai non s’arrèsta
Una farandòla que brandís
E que nos mena pels camins
Occitania per ieu en una dança
Es una fada que totjorn nos balança
Una fachilièira que sorís
Que nos ensenha l’estèla que lusís.

Occitania per ieu es una idèia
Una istòria, un conte, una epopèia
Un pantais que totjorn rebondís
Un perfum que jamai se passís
Occitania per ieu es una arcada
Un pont mirgalhat per las pensadas
Una aventura que nos pren per la man
Per una tèrra novèla a inventar.

Occitania es una flor que grana
Per totes los umans e las umanas
Una jòia que totjorn espelís
Un aurièr que totjorn reverdís
Occitania per ieu es una dralha
Un asuèlh ont l’agach se miralha
E tornejas que tornejaràs
Dins ton país totjorn tornaràs.

Ont t’en vas tan d’aviat
Pastorèla crudèla
Ont t’en vas tan d’aviat
Arrèsta-te un briat
Ieu te vòli donar
Un …

Legir tot

Ont t’en vas tan d’aviat
Pastorèla crudèla
Ont t’en vas tan d’aviat
Arrèsta-te un briat
Ieu te vòli donar
Un ramèl de pimparèlas
De ròsas de lilàs
Se me vòls esperar.

R : Que vòl aquel piòt
L’ausissi pas gaire
Compreni pas plan
Non de que me vòl faire
De que vòl aquel piòt
A l’aire de dos aires
Compreni pas plan
De que me vòl parlar.

Ont t’en vas tan d’aviat
Perque me fas de pena
Ont t’en vas tan d’aviat
Ieu te vòli parlar
Per tu vòli trobar
Un plan ponh de poemas
Plèga de galaupar
Los te vòli cantar.

Ont t’en vas tan d’aviat
Te vòli pas cercar brèga
Adicha d’artelhar
Lo pos non mancarà
Ieu te vòli contar
Lo mal que me rosèga
E ni per me damnar
Te caldrà m’escotar.

Vòli culhir l’amor
Sus ta ròsa boqueta
Te manjar de potons
Coma l’abelha a la flor
Ieu me vòli negar
Dins la mar de tos pelses
E me daissar breçar
Per l’èrsa de tas mans.

Ieu n’ai una brava companha
Que se sona papagai
Es una bèstia estranha
Que m’agrada tant e mai
Totjorn sauta, …

Legir tot

Ieu n’ai una brava companha
Que se sona papagai
Es una bèstia estranha
Que m’agrada tant e mai
Totjorn sauta, totjorn fraunha
E fa tot çò que me plai.

Repic :
Parla parla papagai òc
Parla parla papagai.

A se vesiatz son plumatge
Segur de pautas tombariatz
Amb sas colors dauradas
Sembla un ausèl de pantais
Es una bèstia plan sàbia
Que fa tot lo monde gai.

A pas ges de besonh de gàbia
Non m’escaparà jamai
A lo don de la paraula
Jamai barra pas lo cais
L’occitan es son lengatge
Per charrar manca pas de biais.

Se lo desesper me ganha
Que mon amor m’a quitat
El còspec pren la volada
Va cantar sul seu ostal
A se l’ausissiatz quan ralha
Es un messagièr mannat.

E quand la ruca m’escana
Que me fau un triste sang
Lo mandi cantar lo "Se canta"
Sus l’ostal d’un francimand
D’ont mai los autres se reganhan
D’ont mai ieu me risi de vam.

Pertot ont vau pertot ont vam
Es totjorn lo meteis refram
D’un vam i a los qu’an los bilhets
De …

Legir tot

Pertot ont vau pertot ont vam
Es totjorn lo meteis refram
D’un vam i a los qu’an los bilhets
De l’autre los que fan pinquet.

D’un vam i los que naisson dins de milions
De lençòls de seda e de plumós
De l’autre i a los que naisson sens cabeç
Sens pas res per se parar del freg
D’un vam i a los qu’an un mont d’amusets
Qu’agachan sovent ambé mesprés
De l’autre los que totjorn per Nadal
Tenon ganhats que de còps de pal.

D’un vam i a los qu’estudian pendent 30 ans
Per ne venir rei dels fenhants
De l’autre i a los que ni per ba somiar
Jamai aprenon pas a se sinhar
D’un vam a i los que landran tot lo jorn
Sens cap de relòtge ni patron
De l’autre los que se lèvan plan matin
Per s’anar ganhar lo despertin.

D’un vam i a los que cada tres matins
Se fan palpar lo cuol pel medecin
De l’autre aumens los tèrç quarts de l’umanitat
Qu’an pas lo drech a la santat
D’un vam i a los que pagan per lor cat
Sonhs de manucura e de beutat
De l’autre los qu’an pas un quite picalhon
Per poder avidar lors enfantons.

D’un vam i a los qu’an quatre o cinq ostals
Quand n’an pas castèls o palais
De l’autre los que n’an pas qu’un vièlh carton
Per se suplejar sul trepador
D’un vam i a los que pòdon cada mes
Se crompar un avion sens interés
De l’autre los qu’en trabalhent 20 ans
Se pòdon pagar qu’un vièlh ravanh.

D’un vam i a los qu’an un fum de papièrs
Per traficar dins lo mond entièr
De l’autre los que vivon sens visà
Que devon s’amagar per trabalhar
D’un vam i a los que son totjorn graciats
Que se caran de l’impunitat
De l’autre los que per un uòu panat
Son fòrabandits o executats.

D’un vam i a los que creban dins de milions
Que se fan rebondre al Panteon
De l’autre i a los qu’an pas un quite escut
Per se pagar un tròç d’atauc
D’un vam i a los que son pro remontats
Per se pagar l’eternitat
De l’autre los que sempre tot lor fa mestièr
E tomban dins lo trauc del demembrièr.

Pimpadelon padenon
Paderon pimparaleta
Pimpadelon padenon
Prèsta-me lo panieiron
Es doç coma de seda
De mofa de velós
Quand i …

Legir tot

Pimpadelon padenon
Paderon pimparaleta
Pimpadelon padenon
Prèsta-me lo panieiron
Es doç coma de seda
De mofa de velós
Quand i pensi paureta
Ne pèrdi la rason.

Pimpadelon padenon
Paderon pimparaleta
Pimpadelon padenon
Prèsta-me lo panieiron
I pausarai paureta
O quicòm de plan bon
Un passeron pas piètre
Per tu pimpadelon.

Pimpadelon padenon
Paderon pimparaleta
Pimpadelon padenon
Prèsta-me ton passeron
Es doç coma de seda
A lo papach comol
Met-lo dins ma gabieta
Lo gardarai totjorn.

Pimpadelon padenon
Paderon pimparaleta
Pimpadelon padenon
De que fa ton paseron ?
A tròp volat benlèu
La nèit amai lo jorn
Lo te cal soanjar lèu
Per ieu pimpadelon.

Ieu te’n vòli contar una
Se passa pas dins la luna
Mas dins ton país l’amic
Qu’es pas mens un …

Legir tot

Ieu te’n vòli contar una
Se passa pas dins la luna
Mas dins ton país l’amic
Qu’es pas mens un país ric
Cal tot denonciar de longa
E jamai passar l’esponga
Ieu te tendrai estampèl
Te farai regassar los uèlhs.
Ieu te’n vòli contar dòas
Se passa pas dins lo cosmòs
Ms dins ton quartièr fotral
A dos passes de l’ostal
Finta plan per la fenèstra
A drech coma a senèstra
Ni per freg ni per calor
Lo que jai sul trepador.

Pòble mon pòble
De que fas aquí
Pòble mon pòble
Esperta-te deman matin !

Ieu te’n vòli contar tres
Veses qu’inventi pas res
Mas la vertat sabes plan
Es pas totjorn de bon contar
I a de milions de caumaires
Que sabon pas cossí se’n traire
E la borsa de París
Pesolh revengut se ritz.
Ieu te’n vòli contar quatre
Se passa pas dins un teatre
Los palhassas fantonet
Son pas totjorn sul trastet
L’exclusion es tròp prigonda
Pertot la revòlta trona
Per far calar lo rambalh
Balhan de primas per Nadal.

Ieu te’n vòli contar cinc
L’ai pas legit dins Tintin
Mas dins l’agach d’un enfant
Qu’endacòm creba de fam
Aicí dins nòstras carrièiras
Totes crebam de sadolièira
Mas pus lèu que de despartir
S’estimam mai fòrabandir
Ieu te’n vòli contar sièis
Non deguns es pas perfièch
Es sovent al pus naut nivèl
Que lo lop manja l’anhèl
Te vau citar qualquas personas
Que crentan pas la vergonha
D’un costat vendon d’armament
De l’autre escampan pensaments.

Ieu te’n vòli contar sèt
Mai anam mai venèm pècs
Lèu lèu dins lo monde entièr
Totes cagarèm parièr
Pertot la granda finança
Ten de menada la dança
E par nos trolhar melhor
Buta la globalisacion.
Ieu te’n vòli contar uèch
L’ai pas somiat dins la nuèch
Del costat de las potingas
I a quicòm que me desmingra
Las firmas farmaceuticas
Qu’an un bon sens de l’etica
Son prèstas a far lo ben
Mas servèsson lors brevets.

Ieu te’n vòli contar nòu
Soi un escota quand plòu
Ara i a pas de problemas
Que sabon mudar las genas
An inventat quicòm de fat
Pel progrès de l’umanitat
Fargan de nòvas semenças
Que se’n resèrvan las licéncias
Ieu te’n vòli contar dètz
Se contunham serem cuèch
Jos la capeta del cèl
Los desèrts venon mai bèls
Pertot los pòbles s’amassan
Per arrestar la calimassa
Mas lo qu’enfuma mai fòrt
Vòl pas signar fòrt e mòrt.

Ieu te’n vòli contar maitas
Que tròp de causas m’acaissan
Bush vòl gobernar lo monde
A còps de dolars e de bombas
Après Bagdad e Kaboul
Ont anirà aquel capbord
Los fats de Dieu e la vertat
Son pas jamai d’un sol costat.
Te vòli contar la darrièira
Qu’ara me trapa la lassièira
Nos cal pas mancar lo trin
Que l’istòria es en camin
Pertot cal far tombar las jaulas
Pertot préne la paraula
Farem un monde melhor
Aumens lo temps d’una cançon.